Од денеска и официјално почна да работи новата Оперативно-техничка агенција (ОТА). Надлежните тврдат дека таа ќе го штити безбедносниот интерес на граѓаните и ќе го спречи нелегалното прислушување во земјата.
„Клучните забелешки од експертската комисија на Прибе се отстранети. МВР односно УБК немаат директен пристап до опремата за следење на комуникациите. Тие не знаат и немаат податоци за примената на посебни истражни мерки кои се на барање на другите овластени органи за следење на комуникациите и уште поважно МВР и УБК немаат никаков пристап до содржината на следената комуникација освен за оние мерки кои се на барање на управата и за кои постои одобрување од судот”, изјави министерот за внатрешни работи Оливер Спасовски.
„Ве уверувам дека не постои ниту теоретска, ниту практична можност за злоупотреба на механизмите. Одговорно тврдам дека нема да ни се повторат бомбите и дека нема да имаме нови вакви афери како во минатото. ОТА е максимално добро поставена, системот е тестиран, сѐ работи како што треба. Одговорно тврдам дека незаконско прислушување нема и нема да има”, изјави Зоран Ангеловски, првиот човек на Агенцијата.
Инаку ОТА е сосема независно тело, односно има свој буџет. Засега работи само со седум лица, но предвидено е да има 25 вработени. Формирањето на новата агенција е дел од итните реформски приоритети во делот на безбедносните реформи. Таа доаѓа како резултат на препораките на експертската група на Рајнхард Прибе.
