Европскиот парламент го усвои извештајот за напредокот на Македонија на патот кон членство во ЕУ, а во него се најде и повик до Унгарија да го екстрадира избеганиот осуден експремиер Никола Груевски. Пратениците од Европскиот парламент ги усвоија амандманите со кои се бара од Унгарија експремиерот Никола Груевски да биде екстрадиран во Македонија.
Aмандмани беа поднесени од Групите на Социјалдемократите и на Зелените пред неколку дена. Во амандманот на зелените се бара екстрадиција и се нагласува дека Груевски од Македонија побегнал со дипломатски пасош од Унгарија. Понатаму е оценето дека ваквиот потег претставува мешање во внатрешните работи на Македонија. Социјалдемократите пак поднесоа два амандмани за азилот на Груевски во кои е нагласено дека експремиерот добил транспарентен судски процес во Македонија и треба да одговара за уште пет кривични истраги.
Европскиот парламент сепак нема надлежност околу екстрадицијата и станува збор исклучиво за политичка порака и јавен притисок врз Унгарија, но без обврзувачка сила.
Парламентот исто така ги отфрли и сите грчки амандмани, вклучително и оние кои бараа да се избрише зборот “македонски” од извештајот, како и амандманот на грчка пратеничка која бараше во резолуцијата за Македонија да се вклучи ниската излезност на референдумот.
За резолуцијата гласаа 470 европратеници, а против беа 116.
