Ученици од прилепските основни училишта дел од проектот „Фудбалски зимски радости“

Во организација на Фудбалската федерација на Македонија и Федерацијата на училишен спорт, во ООУ „Добре Јованоски“ се организираат два еднодневни настана за учениците од второ и трето, односно четврто и петто одделение од основните училишта од Прилеп.

 

Координаторот на проектот „Фудбалски зимски радости“, Здравко Ристески, вели дека проектот бил реализиран во првото полугодие од учебната 2018/2019 година и истиот претставува продолжение на проектот кој бил спроведуван мината учебна година.

 

„Целта на овој проект е подобрување на целиот психофизички развој на учениците од нашата општина. Проектот го работиме со Агенцијата за млади и спорт на Република Македонија и со поддршка на локалната самоуправа и градоначалникот Илија Јованоски“, изјави Ристески.

 

Членот на општинскиот Совет, Кире Тинтоски нагласи дека како град на спортот од кој произлегле многу врвни фудбалери, децата и младите, како и идните спортисти кои ќе произлезат од Прилеп, секогаш ќе ја имаат финансиската и логистичката поддршка од градоначалникот и Советот на општина Прилеп.

 

„Сакам искрено да ги поздравам сите спортски работници и децата кои беспрекорно работат и да им порачам дека Општина Прилеп и во иднина ќе ги поддржува овие спортски настани, со цел нивниот развој да биде во најдобар ред, да излезат нови спортисти од градот и со нивните успеси сите да се гордееме“, истакна Тинтоски.

 

Проектот „Фудбалски зимски радости“ се имплементира во 21 општина во Република Македонија и во него учество ќе земат околу 2.800 деца од 80 основни училишта од нашата држава.

 

 

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.

WP-Backgrounds Lite by InoPlugs Web Design and Juwelier Schönmann 1010 Wien