Бурни реакции во Грција по репортажата на Би-Би-Си за угнетеното македонско малцинство

Грчката влада планира да испрати писмо до Би-би-си во кое ќе ги побие наводите за тврдењето дека „во земјата постои македонско малцинство што со децении е угнетувано”, како што беше прикажано во репортажата на Би-Би-Си наречена „Невидливото малцинство во Грција – македонските словени“.

 

Во репортажата на Би-Би-Си се вели дека со ратификуваниот договор со новоименуваната Република Северна Македонија, Грција имплицитно го признала постоењето на македонскиот јазик и етничката припадност и дека со децении го негираше постоењето на своето македонско малцинство.

 

„Употребата на името „Македонија“ од страна на соседната национална држава директно и јасно признава дека Македонците се самостоен народ и ја отвора вратата за тешки прашања во врска со историјата на грчкото македонско малцинство“, пишува Би-Би-Си.

 

 

Оваа репортажа ја разбранува јавноста во Грција. Според грчкиот весник „Та Неа“, репортажата на Би-Би-Си е „провокативна“ и дека едвај само неколку дена после влегувањето на Преспанскиот договор на сила и почетокот на новата епоха во односите меѓу Атина и Скопје, веќе се појавиле првите сенки околу името на нашата држава. Тие не се однесуваат толку на името, колку до деталите од договорот и до прашањето дали тие ја отвораат вратата за иредентизмот и за македонското малцинство во Грција, коментира „Та Неа“.

 

Реагираше и најголемата опозициска партија Неа Демократија, која ја повика владата „да ги разјасни овие работи и категорично да каже дека во Грција не постои прашање за македонско етничко малцинство“. Неа Демократија ја обвини владата дека со Преспанскиот договор се отвори Пандорината кутија за неисториските барања и тврдења во однос на Грција.

 

 

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.

WP-Backgrounds Lite by InoPlugs Web Design and Juwelier Schönmann 1010 Wien