Сугарески: Капиталните инвестиции моментално се ниски, но годинава сите ќе бидат реализирани

Официјалните податоци од Министерството за финансии покажуваат дека само 1, 09 проценти од планираното за капитални инвестиции биле реализирани во јануари.

 

Причината за слабата реализација, министерот за транспорт и врски Горан Сугарески ја гледа во тоа што не е градежна сезона, а се работи на тендери за предвидените проекти, но очекува дека капиталните инвестции годинава ќе се реализираат.

 

„Сега не е градежна сезона, дел од работите што треба да се сработат се во фаза на тендерирање, така што, нашите очекувања се дека капиталните инвестици ќе бидат многу повисоки од ланската година“, изјави Сугарески одговарајќи на новинарски прашања по промоцијата на проектот „Безбедни семејни паркинг зони“.

 

Тој додаде дека за две недели со почетокот на градежната сезона стартува реконструкцијата на 40 патишта, за што е подготвена целосната документација.

 

„Апсолутно ќе имаме економска година и ако ги гледаме сите показатели не само на буџетските средства што се предвидени за капитални инвестиции, туку и надвор од буџетот, како што е на пример Јавното претпријатие за државни патишта што во моментнов има 300 проценти повеќе средства во однос на првиот квартал лани, уверен сум дека сите бројки од она што Владата го има планирано во буџетот, односно буџетските капитални инвестици, ќе биде остварено“, изјави Сугарески.

 

 

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.

WP-Backgrounds Lite by InoPlugs Web Design and Juwelier Schönmann 1010 Wien