Правниот експерт од Европската комисија Рајнхард Прибе смета дека услов за владеење на правото во земјава се независни политичари.
„Тие треба да имаат политичка воља за да го имплементираат владеењето на правото. На таков начин правниот систем ќе може да воспостави независност. Без демократско управување, не може да постои ниту владеењето на правото“, изјави Прибе.
Тој ова го истакна на меѓународната научна конференција „Доброто владеење и владеењето на правото од перспектива на ЕУ интеграциите“.
Вицепремиерот Бујар Османи рече дека владеењето на правото е воздух без кој не се може во едно општество.
„Владеењето на правото е едно од фундаменталните принципи за започнување на преговорите со Европската Унија, за прогрес на патот кон Унијата, нешто што е многу важно за развојот на државата и општеството внатре“, истакна Османи.
„Убеден сум и можам да најавам дека октомври ќе биде историски месец за Република Северна Македонија, бидејќи сосема заслужено ќе добие датум за започнување преговори со ЕУ“, додаде Османи.
Според Османи, тоа што синоќа лидерите на власта и опозицијата не постигнаа договор за Законот за јавно обвинителство нема да влијае врз евроинтегративниот пат на државата.
