Меј: Работиме на најдобар договор за Брегзит со ЕУ, нема да има втор референдум

Британската премиерка Тереза Меј денеска изјави дека нејзината Влада работи на постигнување на договор за Брегзит со Европската унија, што ќе биде најдобар за Британците.

 

Ваквата изјава на Меј претставува реакција на тврдењето на лондонскито градоначалник Садик Кан дека ако Велика Британија не постигне трговски договор со ЕУ, би можела да загуби речиси половина милион работни места.

 

Меј изјави дека бројката што ја споменува Кан се однесува на сценарио доколку Велика Британија ја напушти Унијата без да биде постигнат договор со Брисел за Брегзитот.

 

„Ние вложуваме напори за постигнување најдобро сценарио за британскиот народ при Брегзитот“, нагласи Меј, додавајќи дека е уверана оти Лондон може да постигне „добар договор“ со ЕУ.

 

Нејзиниот портпарол денеска соопшти дека нема да има втор референдум за членството на Велика Британија во Европската унија, како одговор на зголемените повици за ново гласање за Брегзит.

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.