Димитров: Протераниот руски дипломат се обидел да добие класифицирани информации

Facebook
Twitter
Email
Print

Шефот на македонската дипломатија Никола Димитров на денешната прес-конференцијата со неговата австриска колешка Карин Кнајсл изјави дека одлуката за протерување на рускиот дипломат од земјата ја донеле по внимателно размислување и анализа и поради две причини.

 

Првата, како што посочи тој е да се покаже солидарност со Британија, поради труење со хемиско оружје на поранешниот руски двоен агент. Втората, според него, е бидејќи протераниот дипломат излегол од својот мандат.

 

„Се работи за обид за добивање класифицирани информации важни за безбедноста на Македонија. Но, должни сме да го заштитиме идентитетот на дипломатот и ќе биде штетно да се шпекулира. Нашите сознанија се потпираат врз цврсти докази и немаме дилеми околу тоа“, рече Димитров.

 

Тој порача и дека меѓу пријателите има и недоразбирања, а кога тие ќе се надминат пријателството ќе биде посилно.

 

Од Руската амбасада во Скопје велат дека Македонија ќе ги сноси последиците од ваквиот чекор.

 

„Исклучително непријателски и со ништо неоправдан чекор кој што е без преседан во руско-македонските односи. Одговорноста за последиците лежи целосно на македонската страна“, реагираше Руската амбасада во Скопје на Твитер.

 

МНР вчера соопшти дека и Македонија протера еден дипломат на Руската Федерација во Република Македонија поради случајот Скрипал. Како што велат од МНР, одлуката е донесена во тесна консултација со нашите сојузници и партнери од ЕУ и НАТО и во солидарност со Обединетото Кралство на Велика Британија и Северна Ирска, во согласност со член 9 од Виенската конвенција за дипломатски односи од 1961 година.

 

Не е дозволено преземање на оваа содржина или на делови од неа, што се однесува на текст фотографија видео без дозвола од редакцијата на ИНФО КОМПАС.

Можеби ќе ве интересира

Следете не на facebook

 

Вашата поддршка многу ни значи