САД, Велика Британија и Франција утрово околу 4 часот извршија воздушен напад во Сирија. Соопштија дека нападот има за цел да ги уништи погоните за производство на хемиско оружје кое според нив е искористено во последниот напад врз цивили во областите кои се под контрола на бунтовниците.
Пентагон соопшти дека цел на нападите биле Дамаск и две локации во Хомс, каде што се произведува хемиско оружје. Нападот е извршен како одговор на наводната употреба на хемиско оружје во сирискиот град Дума.
Сириските медиуми јавија дека е погоден научно-истражувачки центар во овој град, за кој Пентагон тврди дека е користен за развој и производство на хемиско оружје.
Западните медиуми објавија дека биле истрелани 110 проектили, а целите биле три локации каде се чува или произведува забрането хемиско оружје. Руските медиуми пак, објавија дека 70 проектили биле пресретнати од страна на сириската против-воздушна одбрана.
