Премиерот Зоран Заев најави дека утре ќе има лидерска средба за надминување на разликите со опозицијата околу референдумот, како и за консензус околу потребните реформи за побрзо затворање на поглавјата и почеток на преговарачкиот процес со Европската унија.
Досега работните групи ги запреа прашањата околу изборот на ДИК, законот за финансирање и политичките партии и барањето на опозицијата за техничка Влада, по теркот на Пржинскиот договор.
Овие теми се издигнаа на лидерско ниво, па политичките лидери ќе треба да ги усогласат позициите, особено во делот на изборот на нов состав на ДИК, што ќе треба да го спроведе референдумот, кој, според најавите, се очекува да се одржи во септември или во октомври на есен.
Како што кажа Заев, на заедничката прес-конференција со еврокомесарот, Хан, подготовките за средбата ќе започнат уште денеска.
