ВИДЕО – Самарџиоски : Поигрување и понижување со граѓаните е покачувањето на пензиите за 36 денари

Власта на Зоран Заев и СДСМ секој ден ги понижува граѓаните и гази врз нивната чест и достоинство. Така е и со последниот случај на покачување на пензиите за 36 денари за најниската и 63 денари за просечната пензија. Вакво девалвирање и поигрување со работниот век на граѓаните е можен само кога СДСМ е на власт. Така беше и во минатото, а за жал тоа се пресликува и сега. Истакна на денешната прес конференција Стеван Самарџиоски член на ОК на ВМРО-ДПМНЕ Прилеп.

 

 

Прес конференцијата ја пренесуваме во целост.

 

„Ова се случува после промената на Законот за пензиско и инвалидско осигурување кој го направи оваа одродена власт и со кој сега зголемување на пензиите се врши само кога постои раст на трошоците за живот, а не како претходно кога пензиите растеа и со растот на платите.

 

Со ваква срамна одлука пензионерите наместо да добијат 4% раст на пензиите оваа година, за нив се предвидени само мизерни 0.4% раст на месечните примања.

 

Над 10.000 пензионери во Прилеп се исто така понижени и разочарани од овие 36 денари покачување. Тие не сакаат промотивно бесплатно возење во автобуси болиди, туку сакаат повеќе пари месечно. Сакаат повеќе пари затоа што заслужуваат и затоа што со нивниот работен век придонеле за својата држава и своите семејства.

 

Никаде во светот и во Европа не се применува оваа формула на покачување на пензиите, туку се зема во предвид онаа стапка која е поволна за нив. Само во нивната Северна е можно вакво газење на сопствениот народ, на народот кој за нив е само бројка и кој е важен само во предизборните кампањи.

 

Почитувани, ова не е процутот за кој зборува Зоран Заев! Ова не е држава која оди напред, која се грижи за своите граѓани и држава која гарантира еднакво општество за сите.

 

Затоа, за многу кратко време, следува обнова на татковината и враќање на претходниот Закон за пензии, што гарантираше редовно и вредно покачување на пензиите“, рекоа од ОК на ВМРО-ДПМНЕ Прилеп.

 

 

 

 

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.