Русија ќе произведува забранети ракети, но нема да ги распоредува

Претседателот на Русија, Владимир Путин, денеска изјави дека Русија ќе произведе ракети од ерата на студената војна, кои се забранети според нуклеарниот договор кој истече минатиот месец, но додаде дека Москва нема да ги распоредува доколку тоа претходно не го направат САД.

 

Зборувајќи на економски форум на Далечниот исток, Путин рече дека е загрижен за евентуалното американско распоредување на ракети во Јапонија и Јужна Кореја, бидејќи тоа би претставувало закана за голем дел од територијата на Русија, пренесе ТАСС.

 

„Ако американските ракети бидат распоредени во Јапонија или Јужна Кореја, разбираме дека тоа ќе биде направено за да се избалансираат потенцијални закани од Северна Кореја, но тоа ќе ни создаде одредени значителни проблеми“, истакна денеска Путин.

 

Според неговите зборови, тие ракетни системи најверојатно би можеле да стигнат до цели на голем дел од територијата на Русија, вклучувајќи го и Далечниот исток.

 

Вашингтон минатиот месец се повлече од Договорот за ликвидација на ракети од среден и краток дострел, обвинувајќи ја Русија дека го прекршила тој договор, нешто што Русија пак го негира.

 

 

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.