Викендот што претстои, од 27 до 29 септември, во Крушево ќе се одржи првото издание на Фестивалот на храна и култура „Taste Krusevo“ во организација на СОУ Наум Наумовски Борче.
Во рамки на натпреварот ќе се одржи гастрономски натпревар преку кој ќе се приготвуваат традиционални крушевски јадења, дегустација на храна и посета на културни знаменитости за учесниците, но и за сите посетители. Крушевското средно училиште очекува учество од повеќе државни средни училишта, државни универзитети, но и субјекти од странство.
„Сакам да работам и знам дека настанот ќе успее особено оти си имам работа со млади од Крушево и нивниот оптимизам ме тера да дадам максимум. Дополнително, жално е еден град како Крушево кој има толку многу да понуди, да го перцепираат само преку неколку настани и неколку културно – историски споменици. Затоа, „Taste Krushevo“ треба да покаже колку ние неколкумина имаме оригинални идеи, амбиции и најмногу од се сопствен стил“, изјави Снежана Миленковска, директорка на СОУ „Наум Наумовски Борче“.
За градоначалникот на општина Крушево Томе Христоски овој настан е потврда за широката понуда и туристичкиот потенцијал на Крушево.
„Имаме многу содржини во Крушево и навистина имаме многу да понудиме. Ако цело лето имавме богата понуда за авантуристички спортови и чист воздух, еве сега на почеток на есента покрај авантурата преку „Taste Krusevo“ на посетителите им го нудиме вкусот на нашата храна и историското богатство на културните знаменитости. Ги поканувам сите граѓани од државата и надвор од неа да не’ посетат за овој фестивал и да ја дегустираат вкусната храна“, вели Христоски.
Како поддржувачи на овој настан се јавуваат општина Крушево, Агенцијата за промоција и поддршка на туризмот, Центарот за средно стручно образование, Локален младински совет Крушево, When in Krusevo, Викенд во Крушево, како и многу индивидуалци – Димитар Ангелкоски, Теано Кардула и други.
