Престојниов викенд од 12-ти до 14-ти декември, во кино салата „Мис Стон“, ќе се одржи четвртото издание на интернационалниот филмски фестивал на краток филм “Winter Apricots”.
На отварањето на фестивалот, овој четврток од 21:00 часот, ќе настапи еден од најквалитетните етно состави од Македонија, групата „Баклава“. A претходно, во соработка со италијанскиот фестивал „Fuori Formato” филмската програма ќе ја отворат кратки танцувачки филмови, со почеток од 18:00 часот.
Филмската кулминација фестивалот ќе ја достигне во петок и сабота, односно на 13-ти и 14-ти декември. Во петок со почеток од 18:30 часот ќе бидат прикажани 8 кратки филмови во таканаречената „Балканска Селекција“. Истата вечер од 20:30 часот ќе биде прикажана и првата половина од главните финалисти во „Официјалната селекција“.
На последниот фестивалски ден, во сабота со почеток од 18:30 часот, ќе бидат прикажани 7 Македонски кратки филмови, за кои што публиката со гласање ќе го избере најдобриот. Потоа во 20:30 часот следува втората половина од “Офцијалната селекција“ со уште 6 кратки филмови. За крај во сабота во 22:30 часот ќе бидат прогласени победниците на годинешното издание, а настанот ќе го затвори уникатниот инструментален рок-блуз состав „Filch”.
Одлуката за најдобар филм, ќе ја донесе тричлено жири во состав: Перла Сардела, Ана Опачиќ и Жарко Иванов.
Во петок и сабота, во пладневните часови ќе се одржи и филмска работилница на тема „Филмска Критика“, со доајенот на македонската филмска критика, Влатко Галевски.
И оваа година „Winter Apricots” останува максимално досатепен за сите граѓани со тоа што влезот на сите настани ќе биде бесплатен!
