Ветингот во судството најверојатно ќе се спроведе по изборите, најави денес министерката за правда Рената Дескоска. Како причина за тоа е потребното двотретинско мнозинство што според неа е тешко да се обезбеди во актуелниот состав на Парламентот.
„Ништо не можете да смените во Собранието без двотретинско мнозинство иако верувам дека сите се свесни за потребата од ефикасна правда во државата. Мислам дека нема да се инсистира на одредени решенија со цел да се ослободат одредени обвинети за кои се водат постапки од СЈО“, изјави Дескоска.
Дескоска истакна дека Владата во моментот разгледува опции за проверка на имотната состојба на судиите и обвинителите, како и нивниот интегритет.
Министерката за правда информира дека добар дел од реформите планирани со Стратегијата за реформи во правосудството се завршени.
„Остануваат уште Законот за јавно обвинителство, Законот за измени на советот на јавното обвинителство и некои други закони кои се готови, но нема да има некоја драматична промена да треба да чекаат институциите во спроведувањето. Сега останува клучниот предизвик на Советот за јавни обвинители и Судскиот совет да почнат на спроведување на овие реформи што се направени во законската рамка со цел да добиеме независно, професионално судство и особено јавно обвинителство“, рече Дескоска.
