Италијанската војска била повикана да помогне во транспортот на мртвите пациенти со коронавирус во Бергамо чиј крематориум сега работи без прекин поради епидемијата на Ковид-19, пренесува РТ.
Италија е најтешко погодената земја со заразата на коронавирусот по Кина, до денес наутро таму заболени се вкупно 35.713 лица, додека починати се 2.987 лица.
Поради општиот карантин во Италија погребите се спроведуваат без церемонија, а најтешко е во Ломбардија, провинцијата на северот на Италија каде се наоѓа и Бергамо.
Целата ситуација ја објасни ЦФБ, најголемата компанија за организација на погреби во регионот. Воените камиони биле повикани на помош за превоз на ковчезите во други градови бидејќи синоќа во крематориумот во Бергамо повеќе немало место.
„Во нормален месец би имале 120 погреби. Сега цела генерација ни умре во две недели. Никогаш не сме виделе вакво нешто и ни се плаче поради тоа“, изјави Антонио Рикарди, претседателот на ЦФБ.
Во Бергамо вкупно има 80 погребни компании. Секоја од нив прима барем 12 повици на час.
Според податоците на Ројтерс, во светот вчера од коронавирусот биле заразени над 204.000 луѓе, додека бројот на умрени надмина 8.700.
