Претседателот на Совет на О. Прилеп и на ОО СДСМ Прилеп, Миле Талевски, денеска донираше дезинфекционен тунел за прилепската болница. Апелираше до сите компании и граѓани кои се во можност да донираат за борбата против Ковид 19.
„Предизвикот пред кој сме сите исправени – пандемијата на коронавирусот, од нас бара лична одговорност, солидарност и хуманост. Од тие причини, а со цел да им помогнеме на нашите здравствени работници кои се на првата борбена линија во битката со невидливиот непријател – вирусот КОВИД-19, јас и моето семејство денеска дониравме тунел за дезинфекција за потребите на Општата болница „Борка Талески“ – Прилеп.
Тоа е најмалку што можеме да направиме, за да им помогнеме и да им оддадеме заслужена почит и признание на здравствените работници, за нивната секојдневна пожртвуваност и несебична борба за зачување на здравјето на граѓаните.Апелирам, до сите мои сограѓани и стопански субјекти од градот кои се во можност да донираат и да помогнат, да го направат тоа. Со взаемно помагање и солидарност, со почитување на мерките и препораките, ќе ги надминеме последиците од коронавирусот и ќе го намалиме неговото ширење“, вели Миле Талевски.
