Двајца прилепчани и жител на с. Црнилиште обвинети за тешки кражби по рудници и викендици

 

 

ОВР Прилеп поднесе кривична пријава против М.С.(36) од Прилеп, .Ј.Ф.(25) од Прилеп и А.Џ.(26) од с.Црнилиште, Општина Долнени, поради постоење на основи на сомнение за сторени  четири кривични дела ,,Тешка кражба“ од чл.236 од Кривичниот законик на РСМ.

 

Пријавените делата ги извршувале во периодот од септември 2019 сѐ до април 2020 година.

 

При првото кривично дело, сторено во периодот од септември 2019 до април 2020, пријавените со употреба на сила и подесен предмет влегле во двете работни простории во склоп на рудник лоциран во Рамнобор, село Мелница, Мариово и одзеле работни машини и разни резервни делови (виљушкар, агрегати, компресори, бушилица, каменорезачка, електромотори од машини за преработка на мермер, кабли и др.), со што се стекнале со противправна имотна корист од околу 17.220.000 денари.

 

Второто дело тројцата пријавени го извршиле во периодот на март 2020, при што со подесен предмет влегле во викенд куќа. во с. Бешиште, во која привремено престојувал М.М. од Битола, и од помошната просторија и дворот одзеле повеќе машини и алати (неколку акумулатори, бормашина, хилта, метал детектор, рачен циркулар, агрегат и др.), карабинска и ловна муниција, ловна пушка, автомобилски резервни делови и приколка, стекнувајќи се со противправна имотна корист од 150.000 денари.

 

Третата тешка кражба пријавените ја извршиле во периодот од октомври 2019 до април 2020, така што со употреба на сила влегле во рудник лоциран во с.Бешиште по што од кругот на рудникот одзеле возило „џип УАЗ“ и теренско возило „нисан терано“, во кое имало и документи, при што се стекнале со противправна и мотна корист од 60.000 денари.

 

Четвртата тешка кражба тројцата пријавени ја извршиле во април 2020, прескокнувајќи ја заштитната метална ограда од деловниот простор на рудникот за обработка на мермер, по што се упатиле до викенд куќата, сопственост на М.М., и со употреба на сила влегле во неа и одзеле алат за мерење струја, предмети за домаќинство, потоа од работилницата одзеле електрична машина дребонг и товарно возило „ТАМ“. Со ова дело се здобиле со противправна имотна корист од 60.000 денари.

 

Со преземање на оперативно-тактички мерки и активности од страна на полициските службеници од ОВР Прилеп, дел од предметите се пронајдени и со Потврда за привремено вратени предмети им се вратени на оштетените. Со извршување на овие четири дела ,,Тешка кражба“ од чл.236 од Кривичниот законик на РСМ сторителите се стекнале со противправна имотна корист од околу 17.490.000.

 

 

 

 

 

 

 

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.