За прв пат во поновата историја Саудиска Арабија ќе го ограничи бројот на верниците на Хаџ на околу 1.000 за да се спречи ширењето на коронавирусот, откако им забрани на муслиманите од другите земји да доаѓаат на аџилак.
Министерот за хаџ, Мохамед Бентен, на прес-конференција изјави дека аџиите ќе бидат избрани според строги здравствени критериуми. На оние над 65 години им е забрането учество во хаџот оваа година.
Околу 2,5 милиони муслимани годишно ги посетуваат светите места во Мека и Медина во текот на неделата на Хаџ. Годинава аџилакот треба да започне кон крајот на јули, а секој муслиман треба да го стори тоа барем еднаш во својот живот.
„Кралството Саудиска Арабија сака да им овозможи на сите муслимани од различни националности да доаѓаат на Хаџ, но глобалните здравствени околности нè принудија да направиме исклучок годинава“, изјави Бентен.
Бројот на заболени од коронавирусот во Саудиска Арабија надмина 160.000, починале 1.307, а бројот на нови инфекции е зголемен во последните две недели.
