Број 1 тенисерот на АТП листата во моментот Новак Ѓоковиќ објави дека тој и неговата сопруга Јелена се позитивни на ковид-19, а нивните деца се негативни.
Тој беше организатор и покровител на турнирот „Адриа Тоур“, каде Григор Димитров учествуваше иако беше заразен, а потоа позитивни тестови добија уште неколку учесници.
„Сè што направивме во изминатиот месец го правевме со чисто срце и искрени намери. Нашиот турнир беше од хуманитарен карактер, со идеја да им помогнеме на тенисерите од регионот, да им обезбедиме услови да играат, да заработуваат приходи и на тој начин полесно да го надминат овој тежок период. Во исто време, сакавме да испратиме пораки на солидарност и почит, фер игра. Целта, исто така, беше да им помогнеме на добротворни организации и на оние на кои најмногу им е потребна помош, и драго ми е што голем број луѓе се приклучија на иницијативата“, рече Ѓоковиќ.
„Го организиравме турнирот во време кога вирусот ослабуваше, верувајќи дека се исполнети условите за негово одржување. Многу ми е жал за секој поединечен случај на инфекција. Ги следам изјавите на лекарите и се надевам дека нема да се зголеми бројот на заразени лица. Се надевам дека ниту една здравствена состојба нема да биде комплицирана и дека сите ќе бидат добри“, додаде Ѓоковиќ.
Ѓоковиќ е последниот од тенисерите кој е позитивен, а претходно тоа беа Борна Чориќ, Виктор Троицки и Григор Димитров. Засега потврдени позитивни на ковид-19 се и едно дете, една новинарка и сопругата на Ноле, Јелена.
