Силното невреме кое на 6 август го зафати Прилеп предизвика енормно зголемување на водостојот на Градската река при што се урна импровизираниот мост-насип кој возилата го користеа за да ја преминат реката кај населбата Сточен пазар на улицата „Трајко Николоски“. Од Општина Прилеп тогаш истакнаа дека улицата се затвора во траење од 60 дена и дека потоа ќе биде пуштена за сообраќај. Но и покрај истекот на рокот мостот се уште не е изграден.
За тоа кога конечно ќе биде готов мостот од Општина Прилеп денеска не знаеја да кажат и не упатија да прашаме кај изведувачот на градежните работи „Стентон Градба“.
Од таму пак ни рекоа дека градежните актвности биле во тек и дека мостот се планирало и се надевале да биде готов кон крајот на ноември или почеток на декември, но без конкретни и стриктни ветувања за одреден датум.
