Клиниката за гинекологија и акушерство (ГАК) соопшти дека две родилки кои болнички се лекувале од Ковид-19 починаа во изминатото деноноќие. Родилките добиле пневмонија на двете белодобри крила, предизвикани од ковид и во лекувањето учествувале и лекарски тимови од сите клиники, но шансите за да се спасат нивните животи завршиле безуспешно.
„34-годишна жена од Делчево, второротка, со царски рез е породена термински, со машко бебе од 2.900 грама кое во добра општа состојба веќе е испишано од Гинекологија. Родилката беше примена на ГАК на 10 март во лоша состојба, фебрилна со 38,5 температура, со ниска сатурација и со кашлица. Породена е на 11 март и поради влошување на клиничката состојба, на 14 март таа е препратена на понатамошно лекување во ГОБ „8 Септември“. Ден пред хоспитализација на ГАК, на 9 март добива негативен ПЦР тест, а на Клиниката за гинекологија на 10 март добива позитивен резултат по направен антигенски рапид тест.
Втората родилкa е 32-годишна скопјанка, породена е предтермински, со царски рез во 30 недела од бременоста. Таа на Клиниката за гинекологија биле донесена од Инфективната клиника на 20 март во тешка состојба и само неколку часа по породувањето, поради исклучително лошата клиничка состојба, препратена е на КАРИЛ.
Предвременото роденото бебе е женско и се наоѓа на Одделот за интензивна нега на ГАК и е респираторно зависно“, велат од Гинекологија.
