Министерот за здравство Венко Филипче за ТВ21, најави дека наредната недела Комисијата ќе одлучува какви мерки за заштита од ковид-19 ќе бидат активирани од 1 јуни, како и дека ќе се разговара за евентуално укинување на мерката за носење маски на отворен простор.
„Можно е да се укине мерката за задолжително носење заштитни маски. Следната недела ќе има состанок Комисијата, која ќе одлучува за понатаму. Овие мерки важат до 1 јуни“, изјави Филипче.
Задолжителното носење маски беше воведено на 23 април минатата година. Прво маските беа задолжителни замо во затворени простории, а подоцна мораа да се носат и на отворено. Казната за неносење на маска, шал или марама за граѓаните кои ќе бидат затекнати на јавни површини, е 20 евра. За фирмите, кои не обезбедуваат заштитни маски за вработените, казната изнесува од 500 до 2.000 евра.
Иако во јавноста веќе се шпекулира за ваквата опција, доктор Жарко Караџовски, претседател на Комисијата за заразни болести во изјава за „Слободен печат“ вели дека неопходна е 14 дневна опсервација и дека е се уште рано за заклучоци.
„Се уште е многу рано, имаме денови пред нас, актуелните мерки важат до први јуни, и пред време не можам да кажам ништо. Комисијата за заразни болести ќе одржи состанок следната недела и ќе одлучи какви мерки за заштита од коронавирусот ќе бидат активирани од 1 јуни. Моето лично мислење не е важно, затоа што одлуките не се донесуваат врз ничие лично мислење или став, туку врз основа на бројки и параметри. Се анализираат сите достапни податоци, се анализира колку хоспитализации има, и колку болнички кревети се слободни. Се анализира и смртноста односно колкав е процентот на морбидитет во период од 14 дена“, објаснува д-р Караџовски.
