Од седењето дома дебело заработија најголемите техно маркети во државава

Share on facebook
Facebook
Share on twitter
Twitter
Share on email
Email
Share on print
Print


Седењето по дома и на нив им донесе профит. Техно маркетите во пандемијата може да се пофалат со одлични резултати. Секако голема заслуга за тоа има новиот начин на живот кога поради здравствената криза голем дел од граѓаните почнаа да работат од дома, а учениците наместо на училиште учеа он лајн. Со тоа најмногу се зголеми потребата од компјутери, па се јави дури и недостиг на лап топи. Еден дел од граѓаните присуството по дома го искористија и за реновирање па скокна продажбата и на останатата бела техника.

Сето ова сублимирано придонесе низ четирите најголеми ланци на продавници за техника (НЕПТУН, ТЕХНОМАРКЕТ, СЕТЕК и АНХОЧ) да се евидентирааат 138 МИЛИОНИ ЕВРА вкупен приход во 2020 година.

На прво место по продажба беше информатичката технологија, се купуваше лап топи, таблети, но и мобилни уреди, како и статични компјутери. Пораст имаше и кај останатата бела техника од телевизори до уреди за домаќинствата,велат од Сетек.

Реномираната платформа за финансиски податоци Бизнис Мрежа, заедно со порталот Пари ги сублимираше податоците за минатите 3 финансиски години.

НЕПТУН Е ЛИДЕР НА ПАЗАРОТ СО 59 МИЛИОНИ ЕВРА ПРИХОД

НЕПТУН, трета година по ред е лидер на пазарот со остварени приходи околу 60 милиони евра, поединечно секоја година. Пандемиската 2020 година ја заврши со вкупно приходи од 59 милиони евра, што е сепак за 2.5 проценти пониско остварување, во однос на 2019 година. НЕПТУН изгубил пазар вреден 1.5 милиони евра, што со голема мера на сигурност се трансферирал кај неговите конкуренти. Имено, АНХОЧ, СЕТЕК И ТЕХНОМАРКЕТ прават силен пробив на пазарот и 2020 година ја завршиле со пораст од над 30 проценти. Во апсолутни бројки, приходите на СЕТЕК пораснале за 10.4 милиони евра, кај ТЕХНОМАРКЕТ таквите бројки се движат во рангот на 4.4 милиони евра, што е идентично и кога станува збор за порастот кај АНХОЧ.  Од тука евидентно е дека пораснала побарувачката за техника, а клучниот сегмент за привлекување на клиентите се крие во маркетинг стратегиите, продажните цени и квалитетот на услугата. Вкупниот промет на овие четири компании пораснал за 19 милиони евра во 2020 година.

АНХОЧ СО НАЈГОЛЕМ РАСТ НА ДОБИВКАТА ЗА 226 ПРОЦЕНТИ

Анализата на податоците од Бизнис Мрежа, за остварените добивки во 2020 година покажува дека пресликани се скоро истите трендови како и кај вкупните приходи.

Повторно лидер е НЕПТУН со остварена добивка од 3 милиони евра, што претставува пораст од 11 проценти во однос на 2019 година. Во оваа категорија најголем скок остварил АНХОЧ, чие работење придонело да ја зголемат добивката за 226 проценти. Разликата во добивката меѓу двете компаниии(НЕПТУН И СЕТЕК)  е 357 илјади евра, што е фантастична бројка ако се земе во предвид фактот дека само пред една година таа разлика изнесуваше 1.5 милиони евра. Со солиден раст заврши и ТЕХНОМАРКЕТ (реализиран пораст на добивка од 113 проценти), меѓутоа апсолутното ниво сепак е пониско во однос на конкуренцијата.

ВКУПНО ЧЕТИРИТЕ КОМПАНИИ ВРАБОТУВААТ 1.102 РАБОТНИЦИ

Од аспект на работоспособното население кое е апсорбирано во овие 4 компании, Бизнис Мрежа ја евидентираше следнава состојба:

Вкупниот број на вработени во овие 4 компании на крајот на 2020 година изнесувал 1.102, а лидер во таа категорија останува НЕПТУН, иако кај нив евидентиран е пад од 2 проценти. СЕТЕК со позитивните стапки на пораст на вработени сигурно се доближува до НЕПТУН, додека ТЕХНОМАРКЕТ остварил најголем пораст кај бројот на вработени и процентуално (24%), но и во апсолутна бројка (43). АНХОЧ, исто така бележи пораст на бројот на вработени, но сепак во апсолутни бројки платните списоци се доста пократки отколку кај конкуренцијата, но од друга страна може да се каже дека остварените приходи и добивка се далеку повисоки ако се стават во корелација со бројот на вработени.

Пишува: Редакција Пари
Извор на податоци:
БизнисМрежа.мк

Нови атрактивни профили за учебната 2021/2022 во СОУ „Ристе Ристески-Ричко“

Профили за уписи во I ( прва ) година во СОУ „Орде Чопела“ - Прилеп

Не е дозволено преземање на оваа содржина или на делови од неа, што се однесува на текст фотографија видео без дозвола од редакцијата на ИНФО КОМПАС.

Можеби ќе ве интересира

Нови атрактивни профили за учебната 2021/2022 во СОУ „Ристе Ристески-Ричко“

Play Video

Профили за уписи во I ( прва ) година во СОУ „Орде Чопела“ - Прилеп

Play Video