Се интензивира вакцинацијата на регионалниот пункт во Прилеп. Кети Смилеска, директор на прилепската градска болница изјави дека над 12.000 прилепчани веќе се вакцинирале во пунктот во Прилеп.
„Денеска почна да се имунизира и помладата популација. Има 890 термини, а капацитетот е и до 1000 вакцинирања дневно. Дури 80 насто од граѓаните над 60 години веќе примиле вакцина. Досега се вакцинирани околу 12.000 граѓани од кои 4.000 примиле втора доза и очекуваме тоа да се забрза. Се смета дека уште околу 3.000 прилепчани се вакцинирале на други регионални пунктови. Деновиве преку стопанската комора чекаме да почне вакцинирањето на вработените во фирмите и во институциите, вели Смилеска.
Изутрината се вакцинираа инвалидизираните лица, а почна имунизацијата и на помладата популација.
„Денеска почнавме со вакцинација со фајзер, а и на Синовак, а тече ревакцинацијата со Астра зенека, со Синофарм и со Фајзер. Нема никакви проблеми и се надеваме така ќе продолжи“, вели доктор Сашо Пуцакоски, кој ја следи работата во вакциналниот пункт.
Од Министерството за здравство се очекуваат насоки за теренската имунизација во населените места, која што ќе се одвива напоредно со вакцинацијата во пунктот во Прилеп.
