Левица: СДСМ и ВМРО-ДПМНЕ го одобрија скандалозниот закон за градење автопат без тендер

Share on facebook
Facebook
Share on twitter
Twitter
Share on email
Email
Share on print
Print


Во текот на вчерашниот ден, на Комисијата за финансирање и буџет, помина Предлог-законoт, со кој се предвидува американско-турскиот конзорциум „Бехтел и Енка“ да ги гради автопатите од Коридор 8 и 10 без тендер, со директна спогодба со Владата.

Од Левица со рeакција за овој закон. Нивното соопштение го пренесуваме во целост:

„Власта планира граѓаните да ги задолжи за уште кредити, каде ексклузивитет добива компанија позната по високи цени, корупција и нетранспарентност, при што законот го носи во скратена постапка. Со оглед на тоа дека претседател на Комисијата за финансирање и буџет е пратеникот од опозицијата, Тимчо Муцунски, ваквата здружена зделка делува како уште едно задоволување на апетитите на таканаречените стратешки партнери и нивниот капитал. На самото потпишување на контроверзниот Меморандум помеѓу Владата и „Бехтел и Eнка“ пред неколку месеци присуствуваше и амбасадорката на САД, Кејт Брнз.

Американско-турскиот конзорциум го следат низа коруптивни скандали, како тој во Романија каде проектот траеше 10 години, проследен со одложувања, спорови, меѓусебни обвинувања за уцени и корупција. Финалниот резултат беше за добиени 64% од парите, „Бехтел и Енка“ реализира 12,5% од договорот.

Сепак, најдраматична е изградбата на автопатот за поврзување на Косово со Албанија, каде првичната цена од 300 милиони евра достигна висина од неверојатни 1.100.000 милиони евра! Очигледно, во овој случај се докажа премисата дека „која држава бомбардира, таа држава после ги добива договорите.“

Во македонскиот случај, дека се работи за еклатантен пример на висока корупција, покажува и делот каде е предвидено делумно или целосно да не важи домашното законодавство. Заедничкото одобрување од страна на СДСМ и ВМРО-ДПМНЕ на ваков скандалозен проект покажува дека за овие две партии, единствените црвени линии се интересите на странскиот фактор и неговиот капитал.

Јавниот интерес и добробитот на државата е од секундарно значење, секогаш кога истите ќе дојдат во контрадикција со геостратешките интереси на „стратешките партнери““, велат од Левица.

Не е дозволено преземање на оваа содржина или на делови од неа, што се однесува на текст фотографија видео без дозвола од редакцијата на ИНФО КОМПАС.

Можеби ќе ве интересира

Следете не на facebook

 

Вашата поддршка многу ни значи