Жител на Рио де Жанеиро успеал да се вакцинира со 5 дози од 3 различни вакцини, но бил откриен кога отишол да ја прими шестата и сето тоа во период од 10 недели.
Бразилецот одел во различни центри за вакцинација и од 12 мај до 21 јули се вакцинирал со две дози од вакцините „Фајзер“ и „Коронавак“ и една доза од вакцината „Астра зенека“, а бил откриен кога отишол да ја прими шестата доза, на 16 август.
За да се вакцинираат, Бразилците треба да бидат во одредена возрасна група што одговара на објавениот распоред, да приложат лична карта, а за да добијат втора доза, треба да го покажат сертификатот што им бил даден кога ја примиле првата доза. Центрите за вакцинација не даваат избор со која вакцина да се вакцинираат граѓаните.
Рио де Жанеиро е тешко погоден од новиот бран и мораше да ја прекине имунизацијата на населението поради недостиг на вакцини. Сепак, пријавени се стотици случаи на измама, при што луѓето патувале на вакцинални пунктови во други држави за да примат вакцини по свој избор или трета доза.
