После пауза од 18 месеци училиштето за театар „Чин 4 Сцена 5“ од Прилеп вечерва ја одржа првата претстава насловена „Умри машки“. Претставата беше одиграна во состав на фестивалот „Цело е кога се има 30“.„Умри машки“ „Чин 4 Сцена 5“ ја поставуваат по втор пат. Првиот пат било во 2016 година, но со друг актерски состав. Претставата е од жанрот комедија.
„Тоа е една трио драма, односно комедија, во која што се зборува како невозвратената љубов може да предизвика и психопатски однесувања од страна на еден од партнерите, во овој случај тоа е жената. Ии можам да кажам дека и покрај тоа што се чувствувам среќен што повторно се враќаме на сцената и покрај овие ковид протоколи кои ни го ограничуваат бројот на публика, можам да кажам дека имаме и трема бидејќи по подолго време се враќаме на сцена и публиката го очекува што секој пат го очекува од нас, а тоа е квалитетна претстава, една добра забава и пред се да се претставиме во најдобро светло со надеж дека кога ќе ја почнеме новата учебна година ќе привлечеме што е можно повеќе ученици да ни се приклучат во нашето училиште“, истакна Саша Нацевски организатор на фестивалот и режисер на претставата „Умри машки“.
Претставата е во режија на Саша Нацевски, а играат Кире Најдоски, Максим Алексоски и Теа Кокондоска.
„Во претставата се зборува за машко женските односи и тоа како вистинската љубов може да биде некогаш и опасна. Јас ја играм улогата на Ева, една луда жена која сии поигрува со животите на двајца мажи“, рече Теа Кокондоска, актерка.
Училиштето за театар „Чин 4 Сцена 5“ е во подготовка на уште 2 други претстави кои треба да имаат своја премиера во септември.
„Во моментов подготвуваме завршни престави, една на 16 септември, кога е планирана завршната претстава, на сега веќе средната група, која што се вика „Че ја мажиме Ане“, а на 24 септември станува збор за завршната претстава на почетната мала група, која што е уште без наслов бидејќи тоа е обработка на една тематска единица“, додаде Нацевски.
Од „Чин 4 Сцена 5“ се надеваат дека претставата „Умри машки“ ќе биде поставувана и после завршувањето на фестиивалот „Цело е кога се има 30“. Инаку утре во рамки на фестивалот е концертот на „The Dreamers“ или игранка во ритамот на македонските 90-ти, во 21 часот на летната сцена на домот за култура „Марко Цепенков“. На летната сцена ќе биде активно фестивалското бифе и малиот книжевен саем. Влезот е бесплатен.
