Претседателот Стево Пендаровски денеска во Тетово ја посети опожарената модуларна болница наменета за лекување на Ковид-19 пациенти во Тетово, каде во синоќешниот пожар загинаа 14 лица. Според досегашните информации, Пендаровски изјави дека не постојат индиции дека пожарот бил намерно предизвикан.
„До овој момент нема никаков индикатор дека ова е направено намерно со цел да се постигне некаква друга политичка цел. Меѓутоа, велам, тоа е во овој момент и се разбира тоа ќе ви го каже денеска или наредниве денови надлежниот јавен обвинител. Процедурата е тие даваат наредби до другите надлежни институции од обдукција до МВР. Обвинителот ми рече дека ќе им даде многу кратки рокови, веројатно пет дена за секоја институција да одговори од својата надлежност, по нивното добивање на тие сепак извештаи ќе излезе тој со свој збирен извештај во кој ќе се види прво што е причината за пожарот и второ и дали зад тоа евентуално има човечка грешка“, изјави Пендаровски.
На новинарско прашање дали ќе побара оставка од некого, претседателот Пендаровски истакна дека секогаш инсистира на одговорност, политичка или морална, и изјави дека мора да се почекаат наодите на истрагата. Расветлувањето на ваквите случаи, според претседателот Пендаровски се тест преку кој треба да потврдиме дали навистина ја заслужуваме независноста на државата.
„Сè уште е рано, не поминале ниту 24 часа од пожарот. Јас секогаш инсистирам да има и морална и политичка и субјективна и секаква одговорност, меѓутоа во овој момент не знам дали постои основ за таква одговорност. Она што го знам е дека во што побрз период да се излезе со истрага и извештај за да нема сомнеж дека некој нешто прикрива и не сака да истражи“, истакна Пендаровски.