Меѓународните искуства на младите и нивната мобилност на интернационално ниво имаат значително влијание во однос на индивидуалниот раст и развој на младите, нивните компетенции за вработливост, граѓанското учество, нивната политичка ангажираност и вклученост и се тоа севкупно влијае врз напредокот на една држава.
Кога младо лице има можност да волонтира, студира, учествува на обуки каде се вклучени учесници од повеќе земји и кога младото лице го пренесува ново стекнатото меѓународно искуство во својата земја, стекнатото искуство влијае врз неговите најблиски (семејството и пријателите), потоа врз локалната заедница во која живее и како највисок стадиум на влијание, влијае врз целото општество. Преку ново стекнатото меѓународно искуство младото лице е веродостојна информација и го пренесува искуството првично врз неговите најблиски во најтесната заедница на живеење. Со тоа се отвораат хоризонтите и се „отвора мозокот“ на младите да бидат иновативни и активни кон промените кои се релевантни на нивните потреби и со тоа стануваат активни граѓани во заедницата, а со тоа постепено влијаат и на целото општество. Меѓународните искуства придонесуваат единство во различноста, интеркултурна размена, широк спектар на вмрежување, надоградба на комуникациски вештини, мултијазична компетентност, можност за самоспознавање…
Додека промислуваме подобра мерка и закон за подобра иднина на секое дете, млада личност и граѓанин, да не дозволиме лични интереси да одлучуваат за нивните потреби, но да им пружиме можност на младите сами да ја креираат својата иднина и за сите нас. Нека идните млади лидери, кои би ја претставувале нашата земја, промовираат единство и толеранција, промовираат активно граѓанство и поддршка за раст и развој.
Автор: Викторија Смилеска
