Владата денеска донесе пакет од 26 мерки и препораки за ублажување на последиците од економската криза која настана поради руско-украинската војна во висина од 400 милиони евра.
ДДВ-то на основните прехрамбени производи како лебот, шеќерот, брашното, зејтинот, млекото, месото, оризот и јајцата ќе се намали од 5% на 0%. Ќе се намали и ДДВ-то за струјата, топлинската енергија, и за горивата, како и акцизите за горивата, но овие мерки ќе стапат на сила откако ќе бидат изгласани во Собранието.
„Би се примениле акцизи за 2 денари. Дизелот наместо 85,5 денари би се намалил за 10,5 денари и би изнесувал 75 денари. Бензин наместо 91,5 денари би се намалил околу 11,5 денари и би изнесувал 80 денари“, изјави премиерот Ковачевски.
Меѓу мерките на владата за олеснување на ценовниот шок на граѓаните се најдоа и вредносни ваучери од по 1.000 денари за купување на основни продукти три месеци за 35.000 граѓани, како и субвенции од 1.000 денари за три месеци за пензионерите.
Дваесет и шесте мерки и препораки се поделени во две групи: првата се однесува на заштита на животниот стандард и одржување на ликвидноста на компаниите, а втората група е за финансиска поддршка на компаниите преку Развојната банка.
Премиерот Димитар Ковачевски, презентирајќи го пакетот мерки кој го нарече најголем по Втората светска војна, рече дека буџетот е ликвиден и стабилен и може да ги финансира мерките, а има и доволно стокови резерви, но повика на штедење и без непотребните трошоци на институциите, локалните самоуправи и јавните претпријатија.
