Рано утрово ги посетив семејствата на опожарените куќи и се сочувствувам со нивната трагедија. После удар на гром за неполн час изгореа 4 семејни куќи, кои што оставија пустош зад нив и сета онаа печалба во животот на луѓето ја снема за 5 минути, истакна градоначалникот на Прилеп, Борче Јовчески при денешата посета на семејните куќи кои изгореа во синоќешниот пожар.
„За среќа пожарот не однесе човечки жртви, причинета е огромна материјална штета, речиси до темел се изгорени четирите семејни куќи. Ги повикувам сите општествено одговорни компании да помогнат секој во доменот на можностите, како и хуманите граѓани на општина Прилеп, но и од цела Македонија, со цел да се обноват овие домови и семејствата да се вратат во нормален живот“, рече Јовчески.
Инаку на семејствата кои повеќе немаат каде да престојуваат им е понудено сместување во Домот за стари лица „Киро Крстески Платник“, како и во студентскиот дом „Орде Чопела“, каде што секојдневно ќе добиваат и топли оброци.
Од Центарот за социјални работи во Прилеп истакнаа дека на секое од семејствата ќе им биде доделена парична помош во висина од 30.000 денари, односно максимумот кој е препишан за помош на семејства погодени од елементарни непогоди. По изгласување на одлука на Советот, Општина Прилеп исто така ќе помогне со парични средства.