Попладнево во Прилеп се одржа седница на Општинскиот кризен штаб на која се разговараше за последните дојави за поставени бомби во 3 прилепски основни училишта. На седницата приисуствуваа претставнции од полицијата, ЦУК, ДЗС, ТППЕ, Итната помош и други институции кои можат да помогнат за брза евакуација на децата. Беше истакнато дека сите училишта биле максимално подготвени за брза евакуација, а пред извесен период биле направени и показни вежби од страна на децата.
„Во нареден период можеме со примена на подготовки и вежби да ги доедуцираме се со цел за брзо постапување. Тоа може многу да помогне во справување со вакви немили дојави, а исто така и многу посмирено да се пристапи кон такво евакуирање“, изјави Борче Јовчески, градоначалник на Прилеп.
Од Дирекцијата за заштита и спасување велат дека имале посебно одделение за обука, тренинг и вежби не само за евакуација, туку и за давање на прва помош, заштита од пожари и друго кои ги работеле во голем број не само училишта туку и во други институции и компании.
„Училиштата, градинки, старски домови, болници секоја година се контролирани и давани им се упатства во делот на безбедносните мерки, вклучително и спроведувањето на мерката евакуација. Инаку уште од 2006 година има еден Правилник потпишан од тогашниот министер за образование и директорот на ДЗС каде се обврзани директорите во своите годишни програми да спроведуваат вакви вежбовни активности, а тоа и претходно е правено“, додаде Јован Аврамоски, инспектор за заштита и спасување во ДЗС.
Според законот едно училиште требало барем 2 пати годишно да прави вакви вежби за евакуација.
