Денес во Крушево во присуство на евроамбасадорот Дејвид Гир беа презентирани имплементираните активности кои се составен дел од прекуграничниот проект со општина Елбасан во Република Албанија, кој што е финансиран со средства од Светска Банка и ЕУ.
Како што истакна градоначалникот на општина Крушево, Томе Христоски, денес се гради една успешна приказна за Крушево.
„Крушево се гради и развива секојдневно во поглед на инфраструктура, во поглед што значи развој на адреналинскиот туризам, другите спортови, туризмот воопшто во нашиот град и развојот и успешната приказна пред се‘ на нашата општина“, рече Христоски.
Дел од активностите во проектот се потполна функционална целина на самото полетиште, што значи безбедно и сигурно одвивање на сообраќајот на самото полетиште, паркинг простор, како и имплементирани нови 200 лед сијалици по главната сообраќајница во градот со кои се подобри уличното осветлување и Крушево доби на енергетска ефикасност.
Евроамбасадорот Дејвид Гир истакна дека делегацијата на ЕУ навистина се задоволни со прекрасната соработка која ја имаат со Општина Крушево и што имаат можност да придонесат за да се подобрат состојбите и животниот стандард тука во Крушево.
„Сакам да кажам дека не само овие проекти кои се спроведуваат сега и во иднина ќе доаѓаат нови проекти, затоа што како се приближуваме до ЕУ, тој процес на проширување како што се спроведува и се реализираат реформи во оваа земја, се разбира дека многу промени ќе се случуваат тука на самиот терен, не само во Крушево туку и во другите градови. Промени ќе се случуваат во сферата на животната средина, во сферата на менаџирање со цврст отпад, но и во други сфери на општественото живеење. Се разбира дека ЕУ секогаш ќе биде тука со нејзината поддршка со цел да помогне во тој процес“, рече Гир.
Прекуграничниот проект со Елбасан не е прв проект на Општина Крушево кој што е финансиран од страна на Светска Банка и ЕУ.
„Во моментов имаме реализирано повеќе проекти, како последниот со прекуграничната соработка со градот Елбасан во Република Албанија. Претходно добивме грант од 500.000 евра од Светска Банка и ЕУ за реконструкција на спортска сала, сувенирници, улично осветлување во градот, паркинг горе на полетиште, подобрување на инфраструктурата, позади мене се наоѓа горната училишна зграда која е комплетно реконструирана со ИПА фондовите од 300.000 евра. Зборуваме за значајна сума, која иако не е доволна, јас често викам во празна куќа треба се, но работиме доста со проекти од кои очекувам во наредниот период да се прошират и продлабочат соработките и интензивираат во поглед на инвестиции“, истакна Христоски.
Евроамбасадорот Гир ги повика жителите на ЕУ да ја посетат земјава, особено Крушево затоа што е локација од светска класа, која поседува богато културно и природно богатство.
