Општина Прилеп ја објави програмата за овогодинешното издание на карневот „Прочка“.
Програмата започнува во петок на 28 февруари со изложбата на рачно-изработени маски во 12:00 часот во Ликовниот салон на НУЦК „Марко Цепенков“.
„Во сабота, на 1 март, исто така во 12:00 часот ќе има презентација на традиционалниот обичај, амкањето, во организација на здружението „Преродба“ на платото кај Градскиот Саат, a ќе го имаме и настапот на Robbie Ray Show, на истата локација.
Во недела, на 2 март, нѐ очекува централната манифестација односно Карневалската поворка и самиот Карневал. Поворката ќе тргне во 12:00 часот пред НУЦК „Марко Цепенков“, ќе се движи по бул. Гоце Делчев и ќе заврши на Плоштадот „Методија Андонов Ченто“ каде ќе започне Карневалот „Прочка“ 2025 кој ќе биде збогатен со жонглери, акробати, кловнови, куклари и многу други изненадувања“, велат од Општина Прилеп.
Традиционалниот ручек и одбележувањето на „Чист Понеделник“ заедно со здружението „Прилепски Мечкари“ ќе биде на 3 март, во понеделник, во 12:00 часот на манастирот Св. Ѓорѓија во селото Присад.
