Откупната кампања на тутунот од годинешната реколта во Прилеп, но и на ниво на цела држава се одвива без проблеми. Ова денеска го соопшти директорот на Државниот инспекторат за земјоделство, шумарство и водостопанство, Јане Станкоски којшто на оваа тема разговараше со градоначалникот на Прилеп, Илија Јованоски.
„Откупот на ниво на целата држава, а секако и во рамките на прилепска општина се одвива без проблеми. Од пријавените 9 откупни фирми, досега тутунот го преземаат 8 претпријатија. До последниот рок за отпочнување на откупната кампања 15 декември, се очекува и последната откупна фирма, да обезбеди средства и да почне со откуп. Преземени се околу 7000 од околу 23.000 тони тутун, колку што се очекува да биде тешка годинешната реколта. А, постигната е просечна откупна цена од 204 денари за килограм тутун. Исплатата ќе се врши, така како што е дефинирано во потпишаните договори на кооперантите со откупните фирми“, соопшти директорот Станкоски.
Прилеп е најголемо тутунопроизводствено подрачје во Македонија. Дел кооперанти живеат само од тутунопроизводство. Оттука особено е значајно откупот на реколтата да се врши согласно со законските прописи и регулатива.
Откупната кампања според Законот за тутун, треба да финишира на 15 март.
