Петмина од досегашните членови на ДИК, односно досегашниот претседател на Комисијата, Александар Чичаковски, членовите од СДСМ, Виолета Дума и Игор Милев, Субхи Јакупи од ДУИ, како и Силвана Бонева од ВМРО-ДПМНЕ поднеле барања за апанажа. Сашо Срцев, поранешен член од ВМРО ДПМНЕ и независните членови Реџеп Прекопуца и Атанас Урумов не побарале да им се доделуваат државни средства.
Тие ќе земаат апанажа една година бидејќи овој состав на Комисијата помина повеќе од две години, а сумата што ќе ја добиваат е колку нивната месечна плата, приближно илјада евра. Барањата за апанажа ги поднеле пред еден повеќе од еден месец до собраниската Комисија за избори и именувања.
Оставките на членовите на ДИК дојдоа по големиот јавен притисок кој беше предизвикан кога амбасадорот Бејли обелодени дека си поделиле 12 бонуси за изминатите изборни циклуси. Членовите на ДИК се правдаа дека одлуката е законска, но подоцна сепак подлегнаа под притисокот за морална одговорност. Дел од нив изјавија дека парите ќе ги вратат во буџетот.
Од деветчлената комисија, единствена која не даде оставка по скандалот е Ермира Асани Салија од Беса која го замени Бедредин Ибраими непосредно пред локалните избори. Таа изјави дека не гласала и дека не чувствува одговорност, а приликата ја искористи и за да се пожали дека е материјално оштетена бидејќи не и биле исплатени патни трошоци.
