Зголемување на старосната граница нема да има, а пензиите се стабилни и безбедни, рече денеска министерката за труд и социјална политика Мила Царовска, на прес-конференција во Владата на која информираше за реализацијата на програмските цели во периодот јуни 2017-април 2018 година.
„Пензиите во моментов се стабилни и безбедни, но ние не се интересираме само за сегашните пензионери, туку и за идните. Владата на ВМРО-ДПМНЕ три пати ја зголеми дупката во Фондот и работиме на решавање на овој проблем. Детали сега не можам да откривам, бидејќи сѐ уште се работат анализите и проценките, но многу скоро ќе завршиме и ќе ја информираме јавноста што ќе преземеме“, рече Царовска.
Царовска информира за сработеното во изминатите 11 месеци. Рече дека вкупно 4.535 стечајци добија позитивни решенија, а околу 90.000 граѓани повисока плата, обезбедени се средства за 138 нови вработувања во центрите за социјална работа и се вработени 486 лица на неопределено време во градинките, отворени се три нови регионални преноќувалишта за бездомни лица и е завршена реконструкцијата на 30-те центри за социјална работа кои опслужуват повеќе од 200.000 граѓани.
Покрај капиталните и проектите за детска заштита, се подготвуваат нови закони за социјална заштита и за работни односи, се работи и на нов европски закон за недискриминација, а со Оперативниот план кој овозможува да аплицираат и социјалните претпријатија, како и граѓанските организации, се предвидени една милијарда денари за вработување.
„Од капиталните инвестиции годинава, почната е изградбата на современ центар за аутизам во Скопје, на два дневни центра за лица со интелектуална попреченост во Куманово, на еден дневен центар за Даунов синдром во Скопје и на Дневен центар за церебрална парализа во Прилеп. Обезбедени се и две станбени единици во Неготино и село Тимјаник, а се проширува и капацитетот на Општинскиот дом во Берово. Во тек е трансформацијата на институциите и извлекувањето на децата од институциите, и генералната заложба е да нема дете до 3- годишна возраст сместено во институција, бидејќи тоа негативно влијае на раниот детски развој“, подвлече Царовска.
Одговорајќи на новинарско прашање во врска со домовите „Ранка Милановиќ“ и „25 Мај“, Царовски нагласи дека е преземено се беше во рамки на Министерството. Сменет е директорот во „25 Мај“, а едно лице од „Ранка Милановиќ“ е суспендирано по итна постапка.
