За ЕУ да стане успешен фактор на глобален план треба да биде успешен регионален фактор, оцени денеска македонскиот министер за одбрана, Радмила Шекеринска за време на меѓународната конференција „ Кон изградбата на нов европски одбранбен идентитет“ во Софија.
„Гледаме колку проширувањето е успешно, затоа што има дополнителна безбедност на континентот благодарение на проширувањето на ЕУ“, додаде таа.
Според неа, позитивните промени со повторното враќање на значењето или погледите кон Западен Балкан се чекори во правилен правец.
Шекеринска додаде дека иако има извесен скептицизам кон проширувањето, никој нема сомнеж дека безбедноста е првата повелба на Обединета Европа и оваа безбедност не може реално да се постигне доколку има стратегиски бели полиња на континентот.
„Имаме јасни примери за користа на двете страни од едно проширување, забележаа таа и додаде дека доколку се дозволи долг политички или стратегиски вакуум, тој може да предизвика закани кон европската безбедност. Се надеваме дека европскиот идентитет во областа на одбраната ќе добие јасна форма и ликови и повеќе ќе биде стратегиско смело мислење и брзо донесување одлуки од европска гледна точка. Тоа е неопходно за сите нас кои зависиме од една силна Европа“, коментираше македонскиот министер за одбрана.
Шекеринска претходно имаше билатерална средба со својот бугарски колега Красимир Каракачанов.
„Денеска од Софија ја испраќам истата порака дека приемот на Македонија во НАТО и почетокот на преговорите со ЕУ ќе биде голем плус за нас, но и голем плус за нашите соседи и за безбедноста на целиот регион. Благодарам за поддршката и очекувам нашето партнерство уште повеќе да зајакне“, рече Шекеринска на заедничката прес конференција со Каракачанов.
Каракачанов како знак за добрососедство и пријателство меѓу двете земји го посочи учеството на македонска делегација на воената парада в сабота во Софија, по повод 140 години од формирањето на бугарската армија.
