Годишната прослава на Светската недела на вселената во Македонија почнува денеска со темата „Вселената го обединува светот“. Целта на овој настан на глобално ниво е да се стави акцент на придобивките од вселенските истражувања спроведени во текот на изминатата година за решавање на предизвици на планетета Земја и во вселената.
„Секоја година од 4 до 10 октомври луѓето од целиот свет се собираат за да ги прослават достигнувањата во истражување на вселената и да ги едуцираат и инспирираат младите“, велат локалните координатори на Светската недела на вселената во Македонија, Марина Таневска и Дора Локвенец
Во оваа иницијатива изминатата 2017 година се вброија 3.700 настани во 80 земји, меѓу кои и Македонија, а оваа година се очекува бројот на настани да е уште поголем.
Годинашните активности на Неделата на вселената во Македонија вклучуваат неколку предавања и работилници за деца од различни возрасти и посета на мегалитската опсерваторија Кокино.
Во текот на наредните седум дена на официјалната Фејсбук страница ќе може да се научат интересни факти за вселената, како дел од серијалот на објави #ДалиСтеЗнаелеДека.
Локалните координатори на Светската недела на вселената во Македонија ги повикуваат сите вљубеници во вселената и небесните тела да се вклучат во иницијативата и да ги посетат настаните.
