Претседателот Стево Пендаровски по средбата со Емануел Макрон рече дека францускиот претседател истакнал дека нема друга алтернатива за полноправно членство во Европската унија, но потребно било повеќе време за внатрешна реформа на Унијата.
Претседателот Пендаровски ги изложил своите аргументи пред Макрон, и ги слушнал неговите.
„Ние не би се согласиле на никаква алтернатива на полноправно членство, тоа може да трае години и години, но ние не прифаќаме друга алтернатива. Тој ми рече прецизно дека никогаш не му била намерата да ни даде алтернатива на полноправно членство, само сака да го подобри процесот за да не продуцира само бирократски успеси, а суштински неуспеси кај земјите кандидати“, изјави Пендаровски по средбата во Париз, во рамките на Парискиот мировен форум.
Како што пренесе Пендаровски, Макрон веќе почнал со расчистување на новата методологија за проширување на ЕУ и по промената би можело да се очекува одлука на Европскиот совет за отворањето преговори на самитот во мај во Загреб.
„Претседателот Макрон и неговиот тим веќе имаат предложено нон-пејпер, кој циркулира меѓу земјите членки од пред недела дена и очекува процесот да заврши во наредните месец два начелно. Тој мисли дека методологијата треба да биде усвоена до март, но меѓународна организација со 28 членки не може да бидете сигурни“, кажа Пендаровски.
Макрон рекол и оти промената на методологијата и отпочнувањето на преговори може да одат паралелно и оти земјата испорачала се што се барало од неа.
Македонскиот претседател изјави дека Макрон најавил посета на Македонија во првата половина од наредната година.
