Директорот на Државниот пазарен инспекторат Стојко Пауновски за Слободен печат вели дека е разочаран бидејќи премиерот Зоран Заев не го разбира дека нема да вработи 35 административци прераспределени во неговиот инспекторат, кои се неквалификувани кадри.
„Изјавата на Зоран Заев не ја сфаќам како притисок, само сум малку разочаран што премиерот не ме разбира, иако пратив информација за состојбата во Пазарниот инспекторат. Побарав да ми одговори врз основа на кои критериуми со 247 веќе вработени лица, ни даваат најнесоодветни кадри. За 12 административци со Економски и Правен факултет, нема проблем, ќе ги примиме.
Ама другите се со 180 кредити и можат да работат само обична администрација, зашто се детективи или со факултет за криминалистика од факултетот на Рамиз Мерко. Јас веќе имам вработени кои што во инспекторатот работат 10 години и не можам да ги унапредам зашто систематизацијата не го дозволува тоа поради образованието и сега треба да примам кадар за кој што немаме потреба. Нас не ни треба администрација, туку луѓе за на терен, за во Источна Македонија. Да ни дадат 20 инспектори за во источна Македонија, зашто немаме инспектори во Струмица, Кавадарци, Штип и Кочани“, вели Пауновски за Слободен печат.
Ако премиерот Зоран Заев не ме разбира, немам што друго да кажам освен дека може слободно да ме разреши на наредната владина седница, вели за СДК.МК директорот на Пазарниот инспекторат Стојко Пауновски.
„Нека ги земе некоја друга институција, каде што ќе бидат соодветни според образованието. Велат дека тие сакале да работат во Пазарен инспекторат. И јас сакав пилот да бидам кога бев млад, ама не станав“, вели Пауновски.
