Руското Министерство за надворешни работи излезе со реакција околу одлуката на Македонија да протера нивен дипломат бидејќи, според објаснувањата, бил инволвиран во недозволени активности во земјата.
„На 14 мај беше преземен непријателски чин во однос на руската дипломатија во Северна Македонија. Еден од дипломатите беше прогласен за „персона нон грата“ од страна на локалните власти.
Ние силно ги осудуваме ваквите немотивирани активности кои не можат да помогнат, но влијаат на односите меѓу Русија и Македонија. Ќе следат одговорни мерки“, порачаа од руското Министерство за надворешни работи.
На 18 мај македонското Министерство за надворешни работи соопшти дека „согласно член 9 од Виенската конвенција за дипломатски односи, одлучи да прогласи еден дипломат на Амбасадата на Руската Федерација за непожелна личност во Република Македонија.
„Во оваа насока, на 14 мај 2021 година, во просториите на Министерството за надворешни работи беше повикан амбасадорот на Руската Федерација, при што беше врачена нота со која се наложува на посочениот дипломат да ја напушти територијата на Македонија во рок од седум дена“, пишува во соопштението од македонското МНР.
