За прв пат после 25 години од неговата смрт ќе се слушне звукот на гајдата на Пеце Атанасовски утре на камената бина во Прилеп, на започнувањето на 47-от по ред фестиовал на народни песни и инструменти кој го носи неговото име. По смртта на Атанасовски во 1996 година со неговата гајда досега никој воопшто не свирел. Инаку Пеце Атанасовски е основоположник на овој фестивал. Неговата ќерка Весна Вучиќ Атанасовска истакна дека сите се возбудени да слушнат како ќе звучи оваа гајда, која е недопрена веќе четрврт век.
„25 години таа гајда мируваше, годинава на неа ќе засвири професот Горанче Ангелов, ќе ја слушнеме утревечер во Прилеп, но и во Рудина во Долнени. Да се потсетиме и да видиме каков ќе биде звукот после 25 години незасвирена, Првата гајда во светот, се надевам на задоволство и на учесниците и на оние кои ќе бидат присутни“, вели Весна Вучиќ Атанасовска, ќерка на Пеце Атанасовски.
Со гајдата ќе засвири Горанче Ангелов, етномузиколог, проф. на музичката академија во Штип и член на Управниот одбор на Фестивалот. Ангелов ги повика младите што е можно е повеќе да се занимаваат со фолклорот затоа што со неговото изумирање неповратно исчезнува дел од нашата традиција, историја и култура.
„Се уште постои една одбојност кај голем дел од населението во Македонија дека овие инструменти се стари, не се интересни, не се атрактивни, но морам да кажам дека се што е старо е се повредно и повредно. Со самото исчезнување на овој дел од нематеријалното богатство ние губиме нешто за трајно“, истакна Горанче Ангелов, етномузиколог, проф. на музичката академија во Штип и член на Управниот одбор на Фестивалот.
Комисијата годинава имала тешка задача да одбери 320 учесници од околу 600 колку што биле пријавени. Освен за фестивалот имало и голема желба за учествои на Семинарот за народни песни и инструменти, кој годинава по 9 пат ќе се одржи во состав на Фестивалот.
„Во состав на фестивалот ни е и научниот симпозиум во кој трета година по ред го објавуваме Зборникот на трудови на тема: „Фолклорот во минатото и денес“. Во кој зедоа учество 12 еминентни научници со свои трудови“, рече Горан Василески фолклорист и секретар на Фестивалот за народни песни и инструменти „Пеце Атанасовски“.
Фестивалот започнува утре во Прилеп, а продолжува во сабота на Рудина во Долнени. Освен од Министертсвото за култура е потпомогнат и од Општините Прилеп и Долнени.
Утре во 18 часот ќе има и бесплатен превоз од Прилеп до Долнени за сите оние кои сакаат да бидат дел од настанот.
„Според правилникот на фестивалот за доделувањето на наградите имаме континуирано 10 статуетки и една Гран при, што ги прави скулпторот Емил Солески, и „Гајдата на Пеце“ која ја доделува Општина Долнени“, рече Донка Бачанова, технички секретар и член на Управниот одбор на фестивалот.
„Скоро 50 години Прилеп уживал и ќе ужива во овој фестивал затоа што Пеце Атанасовски има оставено трага во музичкиот дел на народните песни и инструменти, не само во нашиот град туку и во целата наша држава“, рече Илија Јованоски, градоначалник на Прилеп.
Организаторите на Фестивалот велат дека се задоволни со годинешните добиени средства, но за негов поголем раст и развој и воведување на новини, потребна е сепак поголема државна помош. Досега на фестивалот за 46 години учествувале околу 10.000 инструменталисти од Македонија и од странство.
