Бременоста претставува скапоцен период од животот на секоја жена. Тоа е период кога телото поминува низ многу промени и неговите потреби се менуваат. Бремените жени ги забележуваат ваквите промени, особено во поглед на храната. Апетитот се зголемува, се јавува необјаснива потреба од одредени, специфични намирници, а сета внесена храна е и храна за плодот. Во денешната статија ќе ги издвоиме едни од најдобрите и најздрави намирници кои може да ги консумирате за време на вашата бременост.
Кои се општите препораки од експертите?
Здравата исхрана е важна за секој период од животот, но особено е важна при бременоста или доколку се планира бременост. Консумирањето на здрава храна овозможува правилен развој и раст на плодот, како и оптимално здравје на мајката. Поради зголемената потреба од нутриенти, особено од микронутриентите, можно е да има потреба и од употреба на одредени суплементи, како фолна киселина, железо и сл. Секако, нивната употреба најдобро е да ја започнете по претходна консултација со вашиот лекар.
Зголемениот апетит е нормална појава, но нема потреба од „јадење за двајца“. Обидете се да имате здрав појадок секој ден, со цел избегнување на грицки подоцна во денот, кои можат да бидат доста масни и да содржат прекумерни количества на додаден шеќер или сол. Здравата и избалансирана исхрана често значи дека треба да се менуваат количините на намирниците кои ги внесуваме. Тоа значи дека треба да внесуваме поразновидна храна, па макар и во помали количини.
Препораките се да се зголеми внесот на нутритивно-густа храна, односно намирници кои се исклучително богати со нутриенти, како: овошје, зеленчук, полнозрнести житарки, протеини од растително и животинско потекло, мешунки и сл. Во продолжение прочитајте повеќе околу овие групи на намирници.
Кои се најдобрите групи на намирници кои треба да се јадат за време на бременоста?
Како што споменавме, препораките за исхрана кај бремените жени не се драстично поразлични од општите препораки за здрава исхрана. Имено тие опфаќаат внес на повеќе типови здрави намирници.
1. Полнозрнести житарки
За разлика од рафинираните житарки, полнозрнестите или интегрални житарки и нивните преработки, се одличен извор на влакна, витамини и фитохемикалии. Овесот, киноата, интегралниот ориз, јачменот и интегралната пченица се одличен пример за полнозрнести житарки. Овесот и киноата се и одличен извор на протеини, Б витамини, влакна и магнезиум. Пуканките се исто така пример за одлична ужинка, а спаѓаат во групата на полнозрнести житарки.
2. Брокула и други останати зелени и лиснати зеленчуци
Брокулата, кељот, спанаќот и останатите темно зелени зеленчуци се сметаат за едни од најздравите намирници. Тие се богати со растителни влакна, витамините Ц, К и А, како и минералите: железо, калциум, калиум, селен и сл. Тие ја помагаат правилната дигестија на храната, ги намалуваат шансите за констипација и се прилично ниско калорични.
3. Риба, особено онаа која содржи повеќе здрави масти
Рибиното месо, особено она кое е побогато со незаситени масти, како на пример лососот, се смета за исклучително здрава и препоралчива намирница. Лососот е богат со омега-3 масните киселини кои даваат низа на здравствени бенефити и се есенцијални за телото. Лососот е исто така риба која се смета дека не содржи загрижувачки количества на жива. Тој е исто така еден од ретките диетални извори на витаминот Д. Комбинирајте го лосост со низа на свежи или печени зеленчуци и практикувајте го барем еднаш до два пати неделно.
4. Мешунки
Во групата на мешунки спаѓаат: гравот, леќата, грашокот, наут, соја, боранија и кикириките. Мешунките се сметаат за едни од поздравите намирници кои треба редовно да ги внесуваме. Тие се одличен извор на растителни влакна, протеини, комплексни јаглехидрати и низа на витамини и минерали – железо, калциум, калиум, цинк, магнезиум и сл. Мешунките се и одличен извор на витаминот Б9, кој е исклучително важен за време на бременоста.
Можат да се комбинираат во безброј рецепти, да служат како главно јадење или како прилог. Доколку сакате да прочитате повеќе околу мешунките, кликнете тука.
5. Месо со ниска содржина на масти
Помалку масното говедско месо и пилешкото месо се одлични извори на комплетни, квалитетни протеини. Говедското месо е исто така богато со железо, холин и други Б витамини, нутриенти кои се повеќе потребни за време на бременоста. Недостатокот од железо е чест при бременост, па затоа е клучно истото да се внесува преку што повеќе намирници. Доколку и тоа не е доволно, неопходно е користење и на суплементи. Комбинирањето на месо со храна која содржи витамин Ц, пример пиперки, домат или брокула, допринесува кон подобрена апсорпција на железото.
Покрај овие групи на намирници, се охрабрува и препорачува внесот на:
Јајца;
Што поголем и поразновиден внес на овошје;
Сладок компир;
Шумско овошје (боровинки, малини, капини и сл.);
Јаткасти плодови (орев, бадем, лешник, ф’стак и др.);
Семиња (сусам, чиа семе, сончогледово семе, семки од тиква и сл.).
Покрај препорачаните, секако постојат и намирници кои треба да се избегнуваат:
Намирници кои се високо масни и богати со шеќер (путер, сладолед, млечно чоколадо, торти, слатки, сокови, чипс и сл.);
Типови на сирења кои содржат мувли и бактерии. Сирењата како чедар и пармезан и општо сите типови на потврди сирења се препорачливи. За другите типови на сирења, осигурајте се дека се добиени од пастеризирано млеко;
Сирова риба и морски плодови;
Сувомеснати производи;
Непастеризирано млеко;
Алкохол;
Внимавајте на внесот на кофеин;
Енергетски пијалоци.
