Правото на здрава животна средина е универзално загарантирано право на секој човек. Сепак, сведоци сме на неизбежни климатски промени кои се случуваат глобално како последица на непоправливите нарушувања и штети кои се направени врз животната средина. Но, како и за многу други нарушувања во балансот, ниту последиците од климатските промени нема да ги сносат сите граѓани подеднакво. Оттука, потребно е посебен фокус да се стави на климатската правда, која гледа на климатската криза низ призмата на човековите права и на верувањето дека со заедничка работа можеме да создадеме подобра иднина за сегашните и идните генерации.
Едни од најмаргинализираните групи на граѓани кои живеат во нашата држава, а особено во Пелагонискиот регион се Ромите и лицата од руралните средини. Бројни фактори низ годините придонеле овие граѓани да бидат и најизложени на ризиците од климатските промени, а од друга страна да бидат најмалку во можност да се изборат за климатска правда.
За таа цел, СТАНИЦА П.Е.Т. во период од 20 – 24 декември 2021 година реализираше 5 (пет) дневен едукативен караван со граѓаните и институциите под наслов „Заштити ја животната средина“ во Општина Кривогаштани (с.Обршани, с.Воѓани и с.Кривогаштани) и Општина Прилеп (нас.Тризла и во центарот на градот), со цел споделување информации и промотивни материјали со граѓаните и институциите од двете општини заради истакнување на важноста од одржување на здрава животна средина.
Преку едукативниот караван и дистрибуцијата на промотивниот материјал беа опфатени околу 500 граѓани од двете општини и се нагласи потребата и важноста од одржување на животната средина, преземање на акции за безбедна и здрава животна средина, како и важноста од зачувување на животната средина, преку заеднички напори кои генерираат заеднички бенефит.
*Едукативниот караван е дел од проектот: „Климатска правда за маргинализираните граѓани“, кој го имплементира Здружението СТАНИЦА П.Е.Т. со поддршка од Фондацијата Отворено општество – Македонија во насока на овозможување на пристап до климатска правда за граѓани од маргинализирани заедници.
