Од 3-ти до 11-ти јуни ќе се одржи 56-тото издание на МТФ „Војдан Чернодрински“ во Прилеп. Годинава ќе има само 8 престави во официјалниот дел, а годинешни добитници на наградата за животно дело се актерката Бедија Беговска, доајен на турскиот театар и драмскиот писател Русомир Богдановски. Биле предложени 19 претстави, а селекторот Ивано Додовски се решил да одбере 8, меѓу кои „АртуроУи“ на Народниот театар од Битола, „Бракот на Марија Браун“ во изведба на Струмичкиот театар, „Вишновата градина“ на Турскиот театар, „Декамерон“ од прилепскиот театар, „Јазли“ на Албанскиот театар, „Клетвата на Скотје“ на Театар Комедија од Скопје, МНТ ќе настапи со „Народен непријател“ и претставата „Се викам Горан Стефановски“ во изведба на Драмски театар од Скопје.
„Кога многумина помислуваат дека театарот замолкнал и дека не може да излезе накрај со камшикот на времето и со неправдите на локалните и глобалните силници, овие осум претстави сведочат дека театарот, сепак, не престанал да ги истражува и да ги покажува со јазикот на сценската игра двете најсуштински димензии на човекот – слободата и достоинството“, рече Иван Додовски, селектор на Фестивалот.
Годинава имало одделено драстично помалку средства за фестивалот, така што како и лани поради пандемијата и годинава актерите по одигрувањето на претставата веднаш ќе си заминат, а нема да остануваат во Прилеп како претходните години.
„Откако денеска ја дознавме одлуката на селекторот, сега може да ја конципираме целосната програма, со придружните претстави и манифестации. Секако дека ќе се најдат претставите од Факултетите а набрзо ќе знаеме што дополнително ќе понуди Фестивалот кој се надеваме дека со нетрпение го очекува публиката“, истакна Катарина Коцевска Хаџивасилева, уметнички директор на фестивалот.
Инаку по 2 години Фестиивалот повторно се одржува традиционалниот термин, во 2020 воопшто не се одржа порадии пандемијата, а лани претставите се одиграа дури во октомври.
