Утринава околу 2 часот непознати сторители запалија возило „марка Пежо 206“ чии сопственици се брачен пар од кои едниот вработен во администацијата на Општина Прилеп, а другиот лекар во општата болница Прилеп. Вчера пак беше опожарен автомобилот на прилепскиот пратеник Петар Ристески од редовите на ВМРО-ДПМНЕ, како и автомобилот на неговиот татко. Инаку за 2 недели ова е второ опожарување на автомобил вработен во прилепската локалната самоуправа. Пред 3 недели пак запален беше автомобилот на директорот на прилепски „Комуналец“, Рубин Абрашоски. За еден месец во Прилеп се запалени 5 возила.
Од СВР Битола изјавија дека се преземаат мерки за расчистување на случајот.
„На 21.07.2022 во СВР Битола – ОВР Прилеп е пријавено дека околу 01.00 часот на ул„Киро Нацевски Фетак“ настанал пожар во патничко моторно возило „пежо“, со прилепски регистарски ознаки, сопственост на Н.Р. (65) од Прилеп. Пожарот е изгаснат од страна на територијалната противпожарна единица Прилеп, а повредени лица нема. Увид изврши увидната екипа на ОВР Прилеп“, велат од СВР Битола.
Инаку повеќе месеци наназад Советниците од ВМРО-ДПМНЕ во Прилеп како и градоначалникот на Прилеп обвинуваат дека Прилеп се претвора во крајно небезбеден град, со чести тепачки, грабежи и запалени автомобили. И токму поради тоа бараат смена на командирот на ПС Прилел.
Од МВР пак велат дека сите случаи на тепачки и грабежи биле експресно разрешени. Но мистерија останува кој ги потпалува автомобилите во Прилеп. Вчера МВР излезе со кусо соопштение дека е лишено од слобода едно лице осомничено за пожарот на автомобилот на пратеникот Ристески, но до сега не се открија никакви други детали.
Вчера во Прилеп беа присутни и полициски службеници од Скопје и припадници на неколку полициски единици. Во текот на денот се очекуваат повеќе информации за овие настани, но и реакции на органите.