Градоначалникот на Прилеп, Борче Јовчески ја посети ТППЕ Прилеп и им се заблагодари на пожарникарите за нивната работа и пожртвуваност при справување со огнената стихија која ги проголта домовите на 4 прилепски семејства.
Како што истакна градоначалникот, несебично и ризикувајќи го својот живот пожарникарите дадоа се‘ од себе колку што е можно побрзо да го изгасат огнот, обидувајќи се што е можно повеќе да ги зачуваат куќите во оваа непогода.
„Вашата битка, со огнените јазици е повеќе од херојство и градот Ви благодари за несебичната пожртвуваност и напорот кој го направивте, да ги спасите домовите и животите на луѓето и да не дозволите пожарот да се прошири и врз другите куќи.
Благодарност упатувам до сите Вас, подеднакво!
Суштината на пожарникарската професија е спасување, помагање и пожртвуваност. Токму, такви луѓе сте Вие – професионални и одговорни.
Градот е горд што има ваква пожарникарска служба и вакви пожарникари, совесни, одговорни и посветени професионалци!
Затоа, во мое име, и во името на локалната самоуправа, сакам симболично да Ви доделам Благодарници од Општина Прилеп, во знак на почит за Вашата пожртвувност во изведувањето на работните задачи!“, истакна Јовчески.
