Проценката е реална, но цените се ниски и не ги покриваат сите трошоци иако се зголемени за 20% за разлика до лани. Ова е првиот впечаток на тутунарите на почетокот на откупот на тутунот за оваа реколта.
„Задоволен сум од проценката, но не сум задоволен од висината на цените. Според трошоците и вложениот труд некаде под 400 денари не треба да биде просек на килограм тутун“, рече Звонко Ристески, тутунопроизводител од Прилеп.
„Имам 2,5 декари, еве овој првиот добро помина, но треба да биде 400 денари тутунот, затоа што килограм пилешки стек е 400 денари“, додаде Миле Спиркоски, тутунопроизводител од Прилеп.
„38 до 40 картони донесовме, добро е засега, убаво поминува“, изјави Сејбие Салиоска, тутунопроизводител од Прилеп.
Од Тутунски комбинат Прилеп велат дека се подготвени на сите пунктови за откуп и очекуваат добра реколта.
„Денеска започнуваме, почнуваме секаде, на 28 ваги, 23 пункта, со околу 4.000 кооперанти и очекуваме добра реколта“, истакна Кире Станкоски, директор на Тутунски комбинат Прилеп.
Во моментов има регистрирано 10 откупувачи од кои 8 доставиле динамика за откуп до Државниот инспекторат.
„Ние сме постојано на терен во сите региони на државава, доколку има проблем имаме истакнат број за некакви сугестии или проблеми“, рече Јане Станкоски, директор на Државниот земјоделски инспекторат.
Од Сојузот на на земјоделски здруженија очекуваат дека ќе има борба кој да откупи повеќе тутун, затоа што нема. Од бараните околу 26 милиони килограми, годинава нема да има повеќе од 19 милиони килограми.
„Очекуваме дека и проценката ќе биде полабава и сите фирми веќе ги покачија цените и очекуваме дека добро ќе биде проценет нашиот род“, потенцираше Менде Стомнароски, претседател на Сојузот на на земјоделски здруженија.
Во моментов од 10 откупувачи со откуп стартуваа 4, останатите се очекува тоа да го направат деновиве.
